കൂട്ട്

എനിക്കൊരു കൂട്ട് വേണമായിരുന്നു

കറിയിലെ ഉപ്പിനെക്കുറിച്ചും വാടക കുടിശ്ശികയെക്കുറിച്ചും

ബന്ധുക്കളുടെ കുറവുകളെക്കുറിച്ചുമല്ലാതെ 

എന്റെ സ്വപ്‌നങ്ങൾ കേൾക്കാൻ , എനിക്ക് കേൾക്കാൻ

ഒരു കൂട്ട് .....

കിടക്കയിലെ കെട്ടിമറിയലുകൾക്കല്ലാതെ

രാത്രിയുടെ ഭംഗി കണ്ടു

എന്നോട് സംസാരിക്കാൻ ,

എനിക്ക് സംസാരിക്കാൻ ഒരു കൂട്ട്

ഓഫീസിലേക്കുള്ള ഓട്ടപ്പാച്ചിലും

റേഷൻ കടയിലേക്കുള്ള നെട്ടോട്ടവുമല്ലാതെ

ഒരു കാരണവുമില്ലാതെ ,തോന്നുന്നിടത്തേക്കു യാത്ര പോകാൻ

എനിക്കൊരു കൂട്ട് വേണമായിരുന്നു ....

നിരാശയുടെ പടുകുഴിയിലേക്ക് വീഴുമ്പോൾ

എത്തിപ്പിടിക്കാൻ, പിടഞ്ഞെഴുന്നേറ്റ ജീവനെ അണച്ച് പിടിക്കാൻ ,

ചാരി നില്ക്കാൻ ഒരു കൂട്ട് വേണമായിരുന്നു  .....

ഞാനാ കൂട്ട് തേടിയപ്പോൾ അവരെന്നെ 'അവിഹിതക്കാരി  ' ആക്കി

ആ പേര് ഭയന്ന് എന്റെ കൂട്ടിലേക്കൊളിച്ച

ഞാൻ എന്നോട് തന്നെ മിണ്ടാൻ തുടങ്ങി

ഒറ്റയ്ക്ക് പെയ്തിറങ്ങാൻ പുറപ്പെട്ടു

അപ്പോൾ ഞാൻ 'ഭ്രാന്തി' യുമായി .